出版及資源

出版及資源

毛裘淑女 — 鱗花草

呢啲係一堆乾葉? 定係毛毛蟲嚟㗎? 呢個「帶刺」嘅草本植物,其實係鱗花草。佢係被子植物嘅一員,屬於爵床科,係香港常見嘅原生植物,大多生於草地、乾旱草坡、灌叢、曠野以及河邊沙地,即使常見,但由於不顯眼嘅外表、花卉太小,好少人知道佢究竟係乜嘢。

形態微妙嘅佢,小花排列得好似鱗片噉,遠睇鱗花草就幾似一位披住毛裘嘅優雅淑女,所以又名鱗衣草。仔細一睇,原來呢位淑女嘅花係呈穗狀花序,葉片卵形至長圓狀披針形,全緣,呈波浪狀,兩面有針狀結晶嘅小線條。頂生或腋生稠密穗狀花序,圓柱形,單生或數個聚生,花常偏於花序一邊。萼五深裂,最外裂片較大,冠檐2唇形,上唇微裂,下唇3裂。花期11-12月至翌年3月。

喂,唔好拋啲咩穗狀花序專有名詞出黎喎,係咩黎㗎?對於植物嘅葉、花、果實嘅種類之多,有人歎為觀止、有人覺得美不勝收、有人會話咁多點記啊?我地不如回到最初嘅起點溫故知新啦!植物可以簡單地分為蕨類植物、裸子植物、被子植物。被子植物再細分為單子葉植物與雙子葉植物。 花就係被子植物嘅生殖器官,佢地嘅生殖構造其實位於花朵嘅內部。事實上,花嘅各部位都係由葉演化而黎嘅。

乜嘢係被子植物啊?咪係開花植物囉。地球進入地質時期嘅新生代(6-8千萬年前)之後,被子植物逐漸成為具優勢嘅陸生植物。花序就係花朵喺植物枝梗上嘅排列方式。花朵連結枝梗嘅主枝稱為「花軸」,分枝稱為「花柄」,再分枝則稱之為「花梗」。花序因每一朵花成熟嘅早晚、花柄嘅長短和分枝嘅形態差異。穗狀花序就係具有一條長花軸,上面生嘅小花沒有花柄,且係由花軸基部嘅小花先開花。具體啲,薰衣草、小麥嘅花序都係穗狀,花朵通通連生喺花軸上,一啲空隙都冇。

通常我地對花朵、植物嘅印象都係七彩繽紛,唔會太為意呢類熟悉又陌生嘅植物,當我地對佢地嘅認識加深返少少,會發現呢啲不起眼嘅淑女,正低調噉依傍著你。

【文:Vincent Tran,香港戶外生態教育協會2019實習生】