出版及資源

出版及資源

我哋都可以係科學家?!

咦。。。圖入面嗰隻係咪白琵鷺呀?

好叻喎~你點知㗎?

我喺有個公民科學嘅調查度知返黎㗎!

其實近年嚟,香港多咗各式各樣嘅生態調查比市民參加,就好似麻雀普查同埋蝴蝶調查,無論男女老幼都可以一齊喺大自然度做研究~

你問我點解要有公民科學?係想比大家一齊參與科學研究,分享成果,同埋認識多啲呢個物種豐富嘅大自然。早係1900年,北美就已經有雀仔嘅調查活動。全靠大量嘅義工先可以廣泛咁收集數據,呢啲資料對日後嘅研究好重要!

就算係日常生活中見到啲唔識嘅植物或者動物都唔使擔心,因為有個叫iNaturalist嘅app可以話比你知佢哋係咩品種。我哋只需要上載照片就可以參與生物多樣性嘅調查計劃,記錄同統計佢哋嘅出現次數仲有分佈位置,亦可以睇下其他人嘅觀察記錄,學識更多嘅物種~

透過公民科學嘅監察同調查,個啲長期又透明嘅數據將會係日後重要嘅資源。同時間,你哋可以更加了解自己身處中嘅環境,進一步明白政府同大眾雙方嘅需要及期望,幫助建造一個更理想嘅社會環境!

你仲等緊啲咩呀?快啲拎起電話同紙筆一齊參與公民科學嘅調查啦!

【文:Cheri Wong,香港戶外生態教育協會2019實習生】